Dantza tradizionala, bake-kultura elikatzeko baliabide eraginkorra.

Bake-kultura. Lehentasunezko balio handia, gaurko gizartean. Bake-kultura elikatu nahi da, indartu, zabaldu, errotu.

Bake-kultura elikatzeko baliabideen artean badago bat, gertukoa, erraza, arina, dibertigarria, erakargarria, merkea… eta zinez eraginkorra: dantza tradizionala. Hori bai, eraginkorra bezain ezezaguna da. Bakegintzarako ikuspegiaz erabili gabea.

Irakaslea

• Patxi Montero Sanz

  Euskal Herriko eta Europako dantza tradizionalen irakaslea. Giza balioen eta bake-kulturaren heziketan aritua. UEUko kidea.

Helburuak

• Dantza tradizionala deskubritzea, bake-kultura elikatzeko baliabide zinez eraginkor bezala.
• Baliabide hau helburu horretarako erabiltzen ikastea.

Edukiak

Alde teorikoa:

• Zergatik da dantza tradizionala bake-kultura elikatzeko baliabide eraginkorra? Zertan da eragin hori?
• Nola erabili baliabide hau? Erabilgarritasun ereduak.
• Orientabide praktikoak.

Alde praktikoa:

• Dantza: aukeratutako dantza tradizionalen bilduma ezagutu, ikasi eta gozatzea. Arrazoi politiko edo ekonomikoak direla, gaur egun topikoz eta aurreiritziz hartzen ditugun hainbat herrialdetako dantzak landuko ditugu (hamabost dantza inguru).
• Proposatzen den metodoa esperimentatu nor bere baitan (bizipena).
• Ebaluazioa, eta emaitzen azterketa taldean.

Metodologia

• Jarduera honek sentipenean izan nahi du eragina. Horregatik, batez ere praktikoa izango da. Praktikoa, parte-hartzailea eta ludikoa.
• Jarduera, dantza egitean datza. Zati handi batean, animazio-ekintza baten itxura izango du: dantza bakoitza labur azaldu, eta dantzatu, tokian tokiko musiken laguntzaz. Horrela, bata bestearen atzetik, erritmo lasai baina animatuan.
• Dantza bakoitzaren aurretik haren jatorria azalduko da (herrialdea edo kultura), haren esanahia, zein egoeratan dantzatu ohi den…
• “Hitzen beharrik gabe”: berezitasun hau erakustea izango da helburu nagusia. Interesatzen zaigu ikasleek beraiek esperimentatzea ez dagoela hitzen beharrik dantzaren bitartez eragina lortzeko.
• Horregatik, benetako egoeran bageunde bezala jokatuko dugu. Diskurtsoetan sartu gabe, dantzan egingo dugu, une ludikoa gozatu, eta utzi, dantzek euren lana egin dezaten (euren edertasunaz menpera gaitzaten).
• Izaera ludikoa: lortu nahi den lehenbiziko emaitza, gozatzea da, ondo pasatzea. Azken helburua (bake-kultura elikatzea), berez etorriko da.
• Aldi berean, jakina, ikasleek dantzak ikastea da helburua, nork bere esparruan erabili ahal izateko gero. Hori horrela, dantzak barneratzeko estrategia egokia erabiliko da.
• Ikastaroaren azken saioan etorriko da teoria, dantzak ikasten amaitutakoan: ikastaroko esperientzia baloratuko dugu, emaitzak, baliabide hau nola erabili, baliabide ludiko bezala erabiltzeko aukera…
• Normalean, ikastaroaren amaieran ikasleak gai izango dira dantza guztiak (edo gehienak) euren kabuz dantzatzeko.
• Material osagarria: ikasitako dantzen bilduma (audioa); dantzak bideoz grabatzeko aukera.

Nori zuzendua

Bake-kulturaren aldeko heziketan diharduten edo interesa izan dezaketen hezitzaile, dinamizatzaile eta erakundeei:

• Hezkuntza arautuko irakasleak: Lehen eta Bigarren Hezkuntza, Hiritartasunerako Heziketa, Musika, Kulturartekotasuna, Helduen Hezkuntza…
• Pedagogia edota psikopedagogiako profesional edo ikasleak
• Gizarte-hezitzaileak.
• Immigrazio-arloko talde, erakunde edo dinamizatzaileak.
• Aisialdiko dinamizatzaileak
• Bake-heziketa edo kultura-irekitasuna jorratzen duten fundazio, elkarte, GKE, talde edo erakundeak.

Oro har, ikastaro hau irekita dago:

• Dantza tradizionalaren edo folklorearen arloan dihardutenei.
• Interesa daukan edonori.

Matrikulaziorako argibideak

Etiketak

dantza, kulturartekotasuna, bakea, udako ikastaroak, dantza tradizionala