Euzkadi euzkotarron aberria da?: Euskal identitatearen hausnarketa XXI. mendearen hasieran.

Ikastaro honi 14 orduko Balio Akademikoa aitortuko zaio.

Sabino Aranaren esaldiak ehun urte beteko dituen honetan, euskal identitatearen oinarritzat izan ditugun hainbat adierazle partikularren inguruko hausnarketa abiarazi nahi dugu. Egungo testuinguru global eta postmodernoan, hizkuntza edota lurraldetasuna bezalako erantzunak euskalduntasuna zer den argitzeko erantzun antzuak direla pentsatuz, orain arte gure nortasuna ulertzeko baliagarria izan zaigun galdera aldatzeko proposamenarekin gatoz: euskal identitatea “zer da” jakin baino, “zelan garatzen da” horretan sakondu nahi dugu. Gure asmoa, beraz, euskal identitatea birsortzen duten praktika eta diskurtsoen azterketan sakontzea da, bide horretan nortasunari dagozkion erantzun aberats eta osatuagoak jasoko ditugulakoan. Era berean, hauen emaitza diren euskal identitatearen errepresentazio edota irudikapenen inguruan hausnartu nahiko genuke: zeintzuk diren, zer aldagairen arabera moldatzen diren eta hauek nork sortu eta zelan birproduzitzen ditugun zalantzan jartzeko asmoz.

Irakasleak

• Uxoa Anduaga Berrotaran

  Soziologian lizentziatua, EHUko ikertzaile predoktorala. UEUkidea.

• Ion Andoni Del Amo Castro

  Soziologian eta Telekomunikazio Ingeniaritzan lizentziatua.

• Koldo Diaz Bizkarguenaga

  UPV/EHU eta UCLko doktorego-osteko ikerlaria, NOR taldeko ikerlaria, UEUko kidea.

  Twitter: @koldobizkar

• Oihane Garcia Santiago

  Soziologian doktorea eta EHUko irakaslea.

• Patxi Gezuraga Uriarte

  agroekologia.org taldeko kidea eta UEUkidea.

• Ekain Rojo Labaien

  Ikus-entzunezko komunikazioan lizentziatua.

• Laura Siles Ceballos

  Arte Ederretan lizentziatua, EHUko doktoregaia.

Helburuak

• Euskal identitatea ulertzeko eta aztertzeko bestelako perspektiba baten beharraz hausnartzea.
• Hau garatzen duten praktika eta sinboloak identifikatzea eta kolokan jartzea.
• Euskal identitatearen irudikapen sozialak eta imaginario kolektiboaren osaketaz aritzea.
• “Euskalduntasunaren” eragileak argitara ekarri (instituzioak, subjektuak, irudikapen sozialak...) eta beraien influentziaz gogoeta egitea.

Edukiak

• Azken urteetan euskal identitatearen ulerkera teorikoak izan duen bilakaera historikoa.
• Egungo euskal gizartearen testuinguruaren klabeak identifikatu eta sakondu.
• Transformatzen ari den euskal identitatea aztertzeko orain arteko erraminta eta ikuskeren egokitzapena: teoria orokorrak (generoa, nazionala...) gure kasura mugatu.

Metodologia

Eduki hauek guztiak behar bezala mamitu ahal izateko, beraz, hiru eguneko iraupena izango duen ikastaro bat egin nahi dugu: goizetan, euskal identitatearen inguruan ikuspegi berritzaile eta desberdin bat proposatzen duten zenbait ikertzaile gazte gonbidatuko ditugu, gaiaren harira egin dituzten ikerketak aurkeztu eta ezagutzeko parada izanik. Arratsaldetan, aldiz, saioei kutsu parte-hartzaileago bat eman nahi diegu, zenbait ariketaren bitartez goizeko eduki teorikoak praktikan jar daitezen. Hauek, hainabt arlotako pertsonen (musika, literatura, kirola...) testigantzek zein bideo-emanaldien bitartez bideraturiko mahai-inguruek borobilduko dituzte, partaideak ikastaroaren zentro bilakatuz. Ikastaroak, beraz, orotara 12 ordu izango ditu: 3 goizez (ikertzaileen eduki teorikoak) eta 2 arratsaldez (testigantza, eta ariketak), lehen bi egunetan; eta 2 ordu goizez hirugarrenean (kurtsoaren balorazioa eta sintesia egiteko).

Nori zuzendua

Orokorrean, euskal identitatearen inguruan interesa duen edozein pertsonari zuzentzen gatzaizkio. Bereziki, gaia Gizarte Zientzietatik lantzen duten ikertzaileei, eta zehazki, euskal gazte ikasle zein lizentziatuei.

Egitaraua