Ikastaroak :: Hezkuntza, Psikologia

Ikusmira aldatzeko feminismotik zelatan

  • Hasiera-data: 2021(e)ko urriaren 4a
  • Amaiera-data: 2021(e)ko urriaren 29a
  • Tokia: Ikasgela Birtuala
  • Ordutegia: Astean zehar. 00:00-24:00
  • Izaera: On-line
  • Ordu kopurua: 30.00 ordu
  • Matrikula-epearen hasiera: 2021(e)ko irailaren 6a
  • Matrikula-epearen bukaera: 2021(e)ko irailaren 30a

Ikastaroa guztiz online izanen da.

Aurretik gertatutakoaren oinordekoak gara, ezinbestekoa da nondik gatozen jakitea, nor garen edo nor izan nahi dugun jabetzeko. Gure historiaurrea ezagutzea eta arbasoak zein diren jakitea, gure identitatearen definizioan inportantzia duen elementua da, baita gure autoestimu kolektiboan ere. Bide horretan, pertsona arrunten bizi esperientziak garrantzitsuak dira, baina, badirudi gizonak direla biografia bat merezi duten pertsonaia bakarrak. Emakumeen bizitzak tradizio patriarkaleko eremuetan gertatzen direnez, emakumeak ez dira protagonista sentitzen, ezta hala izaten ere, beraien bizitzetako protagonistak gizonezkoak baitira.

Bide horretan, gure genealogia feministak arakatu nahi ditugu eta munduari feminismotik begiratu. Hain juxtu emakumeon ibilbide eta ekarpen kultural, politiko, sozial nahiz historikoari jarriko diogu arreta. Beraiek egindako lanari esker baikara gu ere garenak.

Emakumeon ekarpenen inguruko ikerlan, bilduma eta azterketa zenbait badauden arren, oraindik badago bakoitzak zer arakatu eta zer ulertu. Bide horretan saiakera bat da ikastaro hau, orain arte bildutako zenbait informazio, testigantza, testu eta metodologia feminista konpartitzeko helburua eta nahia dugu.

Ikastaroaren metodologia oso praktikoa izango da, helburua norberak bere ikastetxean feminismotik lantzeko proiektu bat egitea delako. Praktikotasunari dagokionez, horrek inpaktu zuzena izango du norberaren hezkuntza ekosistema propioan, hau da, komunitatean.

Ikastaro amaieran, proiektu horiek taldean partekatuko dira, elkarren arteko esperientzietatik ikasteko eta material gehigarria eskuratzeko.

unibertsitatea.net atarian duzu irakasleari egindako elkarrizketa.

Irakaslea

  • Kattalin Artola Vazquez

    EMAGIN ikerketa eta dokumentazio zentro feminista elkarteko kidea. Psikologian graduatua.

Helburuak

  • Feminismoaren oinarriak ezagutzea eta feminismoz bustitzea.
  • Oinarrizko kontzeptuak aztertzea.
  • Gaur egungo genero sistema aztertu eta kokatzea.
  • Genero rolen eta indarkeriaren arteko lotura aztertu eta kokatzea.
  • Feminismoaren garapena aztertzea.
  • Historia egin duten emakumeen lorpenak ikus araztea.
  • Hezkidetzaren garrantzia kokatzea.
  • Hezkidetza indarkeriaren prebentziorako tresna egoki gisa kokatzea.
  • Unitate didaktikoetan genero ikuspegia txertatzeko irizpideak ematea.
  • Ikastetxeei hezkidetzaren inguruko tresnak eskaintzea, eta pertsonei era positiboan eta berezian elkar ezagutzen, bizi izaten eta adierazten laguntzea.
  • Irakasleek berdintasun ikuspegia era transbertsalean txertatzea.
  • Irakasleek hezkidetzako ikuspuntua eta emakumeen ekarpena txertatuta, haien lana aurrera eramatea.
  • Aurrera begira estrategia eta eremu ezberdinak lantzea.
  • Ikastaroari dagokionez, Moodle plataformaren zenbait atal eta baliabide ezagutzea eta norberaren gaitasun digitala indartzea.

Edukiak

1. FEMINISMOAREN OINARRIZKO LURZORUA.

  • Oinarrizko kontzeptuak: patriarkatua, androzentrismoa...
  • Genero sistema.
  • Indarkeria matxistak.
  • Intersekzionalitatea.

2. ATZERA BEGIRADA: GURE GENEOLOGIA FEMINISTAK.

  • Mugimendu feministaren historia, bereziki mendebaldeko jendartean: feminismoaren hiru olatuak.
  • Euskal Herriko genealogiak eta hainbat borroka garrantzitsu aldarriz aldarri.
  • Emakume ezberdinak ezagutuz: munduko hainbat emakume eta zientziari loturiko beste hainbat.

 3. HEZKUNTZAN ARAKATUZ: PEDAGOGIA FEMINISTARANTZ.

  • Nondik gatoz? Hezkidetza eta emakumeak hezkuntzan izan duen tokia.
  • Emakumeen ikusezintasuna eta estereotiporik gabeko erreferenteak.
  • Indarkeriaren prebentziorako hainbat tresna.

 4. PRAKTIKA FEMINISTAK ARLOZ ARLO.

  • Arlo instituzionala.
  • Arlo akademikoa.
  • Argitalpenak.
  • Kalea gurea da.

5. AZKEN PROIEKTUA.

  • Norbere hutsune eta beharren identifikazioa egin.
  • Horiei erantzuteko baliagarria eta erreala den proiektua osatu, egunerokoan erabilgarria izango dena.
  • Proiektuaren aurkezpena.
  • Koebaluazioa.

Metodologia

lkastaroa online motakoa izango da eta, horretarako, Moodle irakaskuntza-plataforman oinarrituta dagoen UEUren “Ikasgela Birtuala” erabiliko da.

lkastaroa parte-hartzailea izango da, eta teoria bizi esperientzietan eta eguneroko lan jardunean kokatzea izango du helburu, hausnarketa pertsonalak elkarbanatzean oinarrituz.

Oinarri kontzeptualak idatzizko zein ikus-entzunezko materialen bidez landuko dira. Ondoren, lan pertsonala beharrezkoa izango da, hausnarketa pertsonaletatik kolektiboetara salto egiteko, horretarako baliabide teknologikoak erabiliz. Talde-dinamiketan (foroetan) norberaren iritzi, hausnarketa, esperientzia edota zalantzak ikaskideekin partekatzeko aukera izango da, taldeari modu eraikitzailean eraginez.

Aldi berean, gure helburua ikastaroan zehar landutako edukiak martxan jartzea izango da, ikasleek momentu oro irakaslearen jarraipena eta laguntza izango dute. Lanketa horren xedea, norberaren ikastetxean gaia lantzeko tresnak edo materialak sortzea izango da.

Nori zuzendua

Izen-ematea publiko zabalari irekia dago baina unibertsitatean ikasten dabiltzan nafar ikasleek izango dute lehentasuna. Edozein etapako irakasleei zuzenduta dago.

Ikasleak onartuak izango dira irizpide honen arabera: izen emate epea zabaldu eta lehenengo 15 egunetan izena ematen dutenen artean, lehenik, unibertsitateko nafar ikasleak, gero gainontzeko nafarrak eta azkenik, beste lurraldetakoak.

15 egun horiek pasata, taldea osatu arte onartuko dira ikasleak.

Matrikulaziorako argibideak

• Ikastaroa DOAKOA da.

Matrikulatu aukera sakatu (goian dago, izenburuaren azpian) eta bertan agertutako zaizun fitxa bete.

• Matrikula-orria bete ondoren, zure posta elektronikoan mezu bat jasoko duzu, matrikulazioa eta ordainketaren inguruko argibideekin.

• Ez baduzu mezurik jasotzen, akatsen bat egon da. Horrela bada, jarri gurekin harremanetan: 948 362563, nafarroa@ueu.eus, (Edurne).

Hemen UEUren matrikulazio-araudi orokorra.

Diru-laguntzen informazioa.

Oharrak

Homologazioa

Ikastaro hau Nafarroako Gobernuko Hezkuntza Departamentuak, irakasleen etengabeko prestakuntza gisa homologatu du.

Homologazio-zenbakia: 101/2021, martxoaren 31koa. Hiru kreditu (3) eskuratu ahal izango dira.

Halaber, ikastaro hau egiteagatik, Nafarroako Unibertsitate Publikoak (NUP) ECTS bat (1) emango die ikasleei. Horretarako, NUPeko erregistro orokorrean aurkeztu beharko dute instantzia orokorrarekin batera, UEUren bertaratze ziurtagiria.

Ebaluaziorako irizpideak

Ikastaroko parte-hartze ziurtagiria lortzeko honako baldintzak bete beharko ditu ikasleak:

• Ikastaroan, gutxieneko % 85eko aprobetxamendua izatea.

Onartuak izateko irizpideei jarraiki, irailaren bigarren hamabostaldian jakinaraziko dugu zeintzuk izan diren onartutako ikasleak, hauei helbide elektronikora mezua bidaliz. Gainontzekoak itxaron zerrendan geratuko dira eta bajaren bat suertatuz gero, beraiekin harremanetan jarriko gara.